info@karti.com.mk

Театар за деца и младинци

*ТЕАТАРОТ ГО ЗАДРЖУВА ПРАВОТО ЗА ПРОМЕНА НА РЕПЕРТОАРОТ

Замена на купените online ваучери се врши на билетарата во Театар за деца и младинци од вторник до недела.

Репертоар за месец март

Еве ни пристига една нова приказна од фантастичната и светски познатата, шведска авторка, Астрид Линдгрен. Таа веќе има свој значаен придонес во светското наследство на детска литература со нејзините дела како и познатиот роман, Пипи Долгиот Чорап. Сега влегуваме во сосема нов свет на ограбувачи, печуркасти џуџиња, диви шуми и авантуристички предели во приказната со наслов „Роња, ќерката на ограбувачот“. Помеѓу завојуваните ривали, помеѓу две банди, две деца го градат својот пат во животот. Две деца кои се од различни кланови на ограбувачи, започнуваат една сосема поинаква авантура. Нивната приказна е приказна за пријателството и силната врска меѓу две чисти души. - Горјан Милошевски, драматург Роња од Астрид Линдгрен е навистина ќерка на еден ограбувач – таа е дива, своеглава и од ништо не се плаши. Приказната за неа е полна со акција па затоа природно ни дојде да ја адаптираме во куклена претстава со многу ритмични и музички секвенци. Додека таа расте, доживува многу пресвртници. За едно такво дете, природно е што некои од нејзините сознанија ќе бидат малку поразлични од начинот на кој размислуваат нејзините родители. - коментар на режисерот, Јакуб Максимов
Живееме во време кога не само декларативно, туку и практично треба да зборуваме, актуелизираме, поставуваме на театарските сцени, теми од областа на животната средина. Неминовно е уште од најмала возраст, децата, младинците, но и возрасните да ги менуваат досегашни навики на живеење во кои се` помалку имаме чувство за околината. Во претставата СУПЕРБАЈКАСТИЧНО, двајцата херои, децата Мила и Давид на свои 10 години, ја започнуваат најголемата битка за нашата планета. За таа цел Давид создава супер - еколошки велосипед водејќи се според изуми и нацрти на неговите претци – климатолози. Тој велосипед отвора порта кон поинаква, бајковидна димензија каде што нашите херои се борат против Небрила Токсичнаја, мајката на целото загадување, кралица на загадениот воздух. За да ја победат тие треба да поминат многу необични, големи и чудни пречки. СУПЕРБАЈКАСТИЧНО преку многу хумор, брливи и брзи слики со игриви мелодии, сака да ве натера да сфатите дека навистина имаме многу малку време за да ја спречиме големата еколошка закана што доаѓа од купиштата ѓубре што секојдневно ги создаваме. Ова е приказна за нашиот свет виден преку една различна перспектива, но со остра и точна порака за нас, за идните генерации и за чистиот и здрав свет. Само во таков свет можеме да живееме. Сите тие важни пораки, претставата ги комуницира со публиката со помош на јасно изградени карактери кои понекогаш потсетуваат на ликови од анимирани филмови, надополнети со гротескни игри и карикатури на познати ситуации од нашето секојдевие. СУПЕРБАЈКАСТИЧНО е еколошка бајка за деца, но и за возрасни, чија цел е да ги разбуди емпатиите кај публиката за поголема грижа кон планетата Земја, нашиот единствен дом. Игор Ивковиќ, режисер Горјан Милошевски, автор на драмата
За жал, разводите денес стануваат се почести, а времето за разговор меѓу децата и родители се пократко. Сегашноста на разни начини ни го краде времето за помирување, мир и смирување. Во тажната нова нормалност и новиот недостиг на време, почувствував потреба да створиме претстава која ќе им подаде рака на децата и младите кои минуваат низ процесот на развод на едно семејство, но и стимул на родителите да поведат разговор со нивните деца и да пробаат да ги разберат нивните гледишта и стравови во сето ова. Од друга страна оваа претстава е „воведен курс“ за сите блиски и начинот на кои тие може да подадат рака на некој ближен кој минува низ развод. Ќе бидеме пресреќни, ако некои деца и млади најдат охрабрување да зборуваат со некого и да ги избегнат вообичаениот срам и страв од околината при соочување со болката поради она што им се случува дома. Секоја болка има лек, понекогаш тоа е разговорот, понекогаш плачењето, понекогаш е подадената рака и разбирањето дека разводот не е крај на светот и дека нема ништо срамно во тоа. Време е да тргнат на страна табуата и да се зборува, за децата и младите да не останат со предлабоки лузни од овој болен и трауматичен процес.
Драги гледачи, добредојдовте во Морското театарче за деца! Вечерва ќе ви ја прикажеме нашата волшебна, надалеку прочуена претстава „Малата Сирена“. Во неа ќе видите како големата и вистинска љубов победува и успева да ги помири сите различности. Но, ќе видите и колку е тежок и полн со искушенија патот на израснувањето и созревањето. Нашите актери, тука, пред вашите очи, ќе се престорат во Сирената, Принцот, Морскиот крал, Морската Самовила, Големата Сирена, Златниот крал, Морската Вештерка и Октоподот. Во овие 50-тина минути тие ќе ве водат низ подводни дворци, морски брегови, кораби, бури, подводни мрачни пештери и златни замоци за да ви ја раскажат најубавата и најромантичната приказна што некогаш е напишана. Искрено се надеваме дека ќе уживате во ова волшебно патување низ прекрасниот свет на Малата Сирена. Поздрав и ќе се видиме кога светлата ќе се запалат. Вашиот аплауз е нашата награда! Искрено Ваш Морскиот Рак Андерсен - директор на Морското театарче за деца
Уште една бајка за која не треба да се трошат зборови, зашто скоро и да нема дете на кое не му е позната приказната за девојчето, кое одејќи на пат кон куќичката на нејзината баба, во шумата налетува на волкот. Во драматуршката предлошка на Александар Поповиќ се појавува ликот на Иванка, која не постои во оригиналната приказна. Иванка е палавата другарка на Црвенкапа и во нашата претстава сосема солидно е одиграна од Винета Дамческа. За Ана Левајковиќ-Бошков, која ја толкува улогата на Црвенкапа, што и да се каже ќе биде премалку за да се опише нејзиното соживување со добро познатиот лик. Можеби најмаркантниот лик во оваа претстава е ликот на Волкот, одигран од феноменалниот Владимир Лазовски. Постојат и други Црвенкапи, на други театри, но ниедна од нив нема ваков Волк кој оставил толку силен впечаток кај детската публика. Прерано е да се каже дека ова е неговата животна улога, бидејќи Лазовски има потенцијал да им подари на децата уште многу вакви незаборавни театарски ликови. Ќе ги изеде ли Волкот Црвенкапа и Бабата, останува да проверете и да се уверите во сето она што сте го слушнале за оваа претстава.
ашата „Пепелашка“ е претстава за двајца млади, но, зрели сонувачи кои успеваат да истраат во потрагата по љубовта. Убавата, но несреќна Пепелашка се чуди на потребата за богатство на нејзините полусестри и маќеата. Таа мечтае по вистинскиот. Принцот, кој има се’, но ја нема онаа вистинската покрај себе, сака сам да ја најде својата сродна душа. Ликовите на Пепелашка која не губи верба, Принцот кој не престанува да ја бара вистинската љубов, Маќеата која врие од злоба, двете полусестри кои луто се караат која е поубава, кралот кој сака само да го жени принцот, расеаната, добра и весела самовила, трапавите симпатични животни и еден слуга кој прави глупост само што ќе мрдне со малото прсте влетуваат во еден брз сплет на смешни, стрмоглави, неизвесни и среќни случки. Па така како што само животот знае да ги намести нештата, вербата на Пепелашка и Принцот и луѓето околу нив, ги носат сите на едно место во исто време. Надежта дека љубовта доаѓа, вербата која секој ден ја чека среќата, тоа се победниците во нашата „Пепелашка“. Драмски автор и драматург Горјан Милошевски
Романот Франкенштајн од Мери Шели ни послужи како повод за истоимената претстава која за цел има да ги истражува различните практики на дискриминација во општеството во кое живееме. Прашањето кој е и што е; што може да биде и кој сè може да биде „чудовиште“, а пред сè прашањето кој проценува и одредува дека Другиот е чудовишен – е темата на оваа наша претстава. Следејќи ги различните теориски и книжевни постапки од Франц Кафка па преку Пол Б. Пресијад и други, се занимававме со прашањето на давање слобода на говор на оние на кои инаку не им е дозволено да зборуваат во јавниот простор. Ако „чудовиштето“ проговори, што ќе ни каже? На кој начин и заради што, ние луѓето едни со други се означуваме со погрешни, нептрифатливи и застрашувачки? Во театарско-изведувачка смисла, јазикот на претставата се гради од практикување куклен театар, како основниот принцип на театарско оживување на неживи тела (објекти), до музичко, рап концертно изведување, како еден вид на социјално ангажиран музички одговор на политичките феномени од нашето секојдневие. - Димитрије Коканов, драматург
Според либретото на истоимената опера на В. А. Моцарт драмскиот писател Русомир Богдановски напишал одличен драмски текст за деца. Текстот ги содржи сите елементи на една класична бајка, во која се судираат доброто и злото, а љубовта секогаш е посилна од сите лоши магии на сите зли волшебници. Помеѓу љубовта на главните протагонисти Памина и Тамино се испречува омразата на лошиот волшебник, кој се што е живо го скаменува со своите зли магии. Тамино, толкуван од страна на Драган Довлев како неспретен принц и со голема доза на хумор, тргнува да ја ослободи грабнатата од лошиот волшебник принцеза Памина, изиграна од секогаш маркантната и беспрекорна Ана Левајковиќ-Бошков. Значаен дел од приказната и дејствието на оваа претстава паѓа врз плеките на Предраг Павловски, кој овојпат во ликот на Папагено уште еднаш ја истакна својата сценска духовитост и снаодливост. Ако сте нестрпливи да видите дали Тамино, помогнат од Папагено, ќе ја ослободи Памина од канџите на злото, повелете на ВОЛШЕБНАТА ФЛЕЈТА.
Светски познатата бајка ПРИНЦЕЗАТА НА ЗРНО ГРАШОК, во текстот на бугарскиот драмски писател Атанас Илков во насловот претрпува промена и на нашиот репертоар се појавува како ЗРНОТО ГРАШОК И ПРИНЦЕЗАТА. Ова е убедливо најстарата наша претстава што се уште е активна. Својата премиера оваа претстава ја имаше во далечната 1993 год. Тоа е приказна за еден млад принц кој стасал за женење, па неговите родители, кралот и кралицата, решиле да му најдат вистинска принцеза за жена. Според старите обичаи вистинска принцеза е онаа која лежејќи на кревет ќе го почувствува и најмалото зрно грашок, скриено под душекот од креветот. Иако во претставата играат само двајца, актерите Изабела Новотни и Владимир Лазовски мајсторски ја исполнуваат сцената, па така се добива впечаток како да се работи за голем актерски ансамбл. Со своето актерско умеење и искуство овие двајца на секоја изведба до солзи ги насмеваат децата. ЗРНОТО ГРАШОК И ПРИНЦЕЗАТА во периодот од 1994 до 1998 година има освоено 4 меѓународни награди, меѓу кои и ГРАН ПРИ наградата за претстава во целина на Меународниот Фестивал БУРБОРАК 94 во Смолен, Р. Бугарија.
Гига мега бајка“ е нова приказна која ни доаѓа од старите приказни. Четири актери кои не можат да ја почнат претставата „Пинокио“ зашто им фали актерот кој го игра Пинокио почнуваат да смислуваат своја приказна. Во паника но со многу фантазија ги раскажуваат познатите бајки и една своја и ги спојуваат во брза, смешна, забавна и поучена бајка - Гига мега бајка. Па така Црвенкапа го пресретнува Волкот и го кара зашто работел со мотика во дворот на баба и’. Тој е градинар кој само сака да живее во мирна и тивка градина и сака да помага на Бабата. А Бабата пак знае карате, Џит-Кун-До и Џиу-Џицу и на Волкот му одржува дебела лекција па тој исплашен сака да избега од својата приказна. Си заминува и ја среќава Поспаната Убавица со која тргнуваат во потрага по златната мотика и големата книга на знаењето... Актерите ни редат еден куп необични и урнебесни случки кои палаво и магично создаваат еден чудесен свет на модерната бајка. Тие и меѓусебно се натпреваруваат кој ќе смисли подобра идеја за приказната, но секогаш добрата идеја победува. Деца, мајки и татковци, време е за нова бајка зашто старите сите ги знаеме. Таа бајка ќе ја раскажеме со многу фантазија, љубов и пеење. Ќе ја раскажеме со една голема порака: Ако заедно смислуваме магични светови тогаш нема крај на нашата богата фантазија и ние стануваме подобри луѓе.