SHAKE STEW
Lukas Kranzelbinder – контрабас, гуембри, лидер
Astrid Wiesinger – алт-саксофон
Fabian Rucker – тенор-саксофон, флејта
Richard Koch – труба
Oliver Potratz – контрабас
Nikolaus Dolp – тапани, перкусии
Herbert Pirker – тапани, перкусии
https://shakestew.com/
Австрискиот бенд Shake Stew е своевиден феномен. Експлодираа на сцената, речиси од никаде, со премиерниот настап на џез-фестивалот Saalfelden во 2016, а веднаш потоа и со нивното албумско деби “The Golden Fang”. Оттогаш, нивниот извонредно енергичен микс од хипнотички афробит и џез грув им донесе огромен успех не само на домашен терен, туку и низ цела Европа. Предводени од ѕвездата во подем - басистот Лукас Кранцелбиндер, тие со молскавична брзина станаа еден од најжешките лајв бендови наоколу, а одличниот прием на вториот албум „Rise And Rise Again “ (со Шабака Хачингс) им обезбеди поширок пласман на нивниот уникатен звук, овозможувајќи им голема турнеја низ Канада, Мексико, Мароко и извонредни настапи на престижните фестивали како Montreal, Rochester и North Sea Jazz Festival. Невообичаената формација на Shake Stew од 2 тапанари, 2 басисти и 3 дувачи е еден од клучните фактори што го прават овој седумчлен бенд посебен. Оваа, на прв поглед, малку чудна инструментација, е меѓу себе природно, органски поврзана, создавајќи го препознатливиот супер-енергичен звук на Shake Stew, врз кој ја изградија својата репутација. Иако се кратко на сцената, тие имаат веќе 3 студиски албуми зад себе, а во моментов се актуелни со (A)live! - нивниот прв албум во живо: високооктанска мешавина од жесток џез и трансоидни грув инјекции комбинирани со мистериозни звучни пејзажи и спиритуални фри-џез ерупции. Со неодамна освоената награда на German Jazz Award во категоријата „интернационален бенд на годината“, Shake Stew се спремни да го освојат и Скопје.
NU MUSIC 4
Christer Bothén – донсо нгони, бас-кларинет, пијано
Goran Kajfeš – труба, клавијатури
Mats Gustafsson – саксофони, флејти
Okay Temiz – тапани, беримбау, перкусии
Christer Bothén - donso n´goni, bass clarinet, piano
Goran Kajfes - trumpets, keyboard
Mats Gustafsson - saxophones, flutes
Okay Temiz - drums, berimbau, percussion
Под заедничкото име NU Music-4, Матс Густафсон и Горан Кајфеш за прв пат се здружуваат со Кристер Ботен и Окај Темиз - некогашните соработници на легендарниот американски музичар Дон Чери. Се работи за нов квартет кој во слободни форми ќе исполнува свои суити и композиции (но и фрагментирани дела на Дон Чери), како реминисценција на еклетичните аранжмани и мултикултурниот пристап на Чери и неговото богато наследство. Дон несомнено беше голема инспирација во нивните кариери. Окај Темиз, славниот турски перкусионист, се сретна со Дон кон средината на шеесеттите години од минатиот век во Стокхолм, поттикнувајќи го толку плодотворниот интерес на Чери за ориенталната музика. Нивната соработка ќе трае десетина години. Најчесто настапуваа во дует и трио формација, со јужноафриканскиот басист Џони Дијани. Во седумдесеттите години, Дон Чери се сретна со Кристер Ботен, една од клучните фигури во историјата на шведската џез музика. Средбата се случи на еден концерт на кој Ботен свиреше н’гони, традиционален инструмент од Мали. Дон и Кристер имаа плодна и креативна дружба, со неколку екстензивни заеднички турнеи. Швеѓаните Матс Густафсон и Горан Кајфеш, зад себе имаат реализирано проекти со децата на Дон: Нене и Игл-Ај Чери. NU Music-4 ги користат влијанијата од фри-џезот, етничката музика од Африка, Турција, Бразил и Скандинавија, потоа од експерименталните музички традиции, како и од формите, структурите и содржините на авангардниот рок и џез. Светската фестивалска премиера ќе ја имаат на Скопскиот џез фестивал.