ROB MAZUREK EXPLODING STAR ORCHESTRA
with FAME’S CHAMBER ORCHESTRA
Rob Mazurek – диригент, труби, електроника, композитор
Angelica Sanchez – пијано
Pasquale Mirra – вибрафон
Josh Abrams – бас
Chad Taylor – тапани
Mauricio Takara – перкусии, електроника
Damon Locks – вокал, семплови
+ Fame’s Chamber Orchestra
www.robmazurek.com
www.fames-project.com
Роб Мазурек е композитор, трубач, визуелен уметник, музички директор и централна фигура на чикашката авангардна сцена од 1990-тите, кој стекна огромна слава со Chicago Underground, бенд што метаморфозираше, низ годините, од дуо во оркестар. Во Бразил, каде што живееше неколку години, тој создаде сличен проект наречен São Paulo Underground, а по враќањето во Чикаго, во 2005 година, го оформи знаменитиот Exploding Star Orchestra. Со овој проект, Мазурек создаде медиум што поседува капацитет да ги опфати различните стилови и идеологии на широкиот опсег на слободни форми на изразување, како и да ги истражи најавангардните трендови на сцената, вклучувајќи музичари од пост-рок, AACM и слободната импровизација. Единствената категорија што би можела да ги опише е „ол-старс“ - секој од избраните уметници е легенда на авангардниот џез, иако некои припаѓаат на американската креативна музика, додека другите се познати по тоа што ја претпочитаат европската импровизација. Творејќи со експлозивна енергија и посветеност, Роб Мазурек блеска, вадејќи го најдоброто од музичарите што трпеливо, внимателно ги избрал. Заедно, тие ги евоцираат врвовите што ги освоија Бела Барток и Гил Еванс, Мортон Фелдман и Бил Диксон, Сан Ра и The Art Ensemble of Chicago. Универзумот е огромен простор. Роб Мазурек го исполнува својот дел со величествен звук.